ابن الليل .. المريد الذى أخذته نداهة الزجل
فى الأول من يونيو من عام 1911 ولد محمد أفندى عثمان خليفة بحى الحسين بالقاهرة، كان والده عثمان أفندى خليفة، صاحب المكتبة والمطبعة العثمانية المصرية، دخل المكاتب الأولية، ثم التحق بعدها بمدرسة النحاسين الابتدائية الأميرية، وحاز شهادة إتمام الشهادة الابتدائية عام 1925، ثم التحق بمدرسة الإبراهيمية الثانوية الأميرية ورغم تفوقه فقد حالت بعض الموانع دون إتمام الدراسة فغادرها عام 1927،وانصرف لفن الزجل، وأبدى فيه نبوغا لا يتاح إلا لرجل خبير بشئون الحياة وعلى صغر سنه ـ يقول شيخ الزجالين حسين أفندى مظلوم رياض فى كلمة مختصرة فى نهاية ديوان ابن الليل ـ تدهشك دقة نظره ورقة تعبيره وطلاوة أسلوبه وآية نبوغه فى فنه ، إنه وهو الناشىء الصغير يبتكر من الأوزان ضروبا لم يسبقه إليها غيره وحينها تفتحت موهبته الكبيرة مبكرا، فنشر أزجاله فى معظم الجرائد التى كانت تعنى بهذا الفن، وقد عرفه قراء الصحف وعشاق فن الزجل وفى الإذاعة باسم "ابن الليل"، صدر الجزء الأول من أزجاله وعمره 24 عاما تحت عنوان "أزجال ابن الليل، محمد عثمان خليفة " 1935، كما كتب مجموعة من المنولوجات منها : لت وعجن – من أين لك هذا – ولع – سخطة، وجميعها غناها الفنان الراحل إسماعيل يس، وقد رحل ابن الليل عن عمر 66 عاما فى السابع من مارس عام 1975.
السياسة
حضرة الست المصونه المستحيه
السياسه فى السنين الحلوه ديه
بعد إهداء السلام بعد التحيه
أهدى شوقى والنبى وحياة عينيه
الكلام دا فيه غلط ؟؟ هـه خضتينى
ـــــــــــ
آه يا خاينه ياللى وقعتينى فيكى
جيتى قولتى لى العواف .. قلت يعافيكى
يوم عرفتك قولت ما حدش شريكى
واما زادت للأسف معرفتى بيكى
قومتى جيتى جوه نايبه زقتينى
ـــــــــــ
أبقى يعنى تسعميت مجنون وحبه
خاينه زيِّك جاهله بشروط المحبه
لو آمن مره تانيه لأى شابه
تظهرى لى السم فى هيئة مربه
جيتى قدمتى لى لما سميتينى
ـــــــــــ
من سلامة نيتى يا اختى وغرامى
رحت شارب م اللى قدمتيه أمامى
واشتياقى يا ستى وهيامى
إلتقيته سم قاتل .. طعمه حامى
والندم مش راح يفيدنى .. موتينى
ـــــــــــ
موتينى وقدمى لى سم تانى
أصلى أستاهل صحيح كل اللى جانى
حد يعنى رح يُخَلد؟ .. كله فانى.. !
واللى يزرع شر .. دا للشر جانى !
بس مش عاوز أشوفك وتشوفينى
ـــــــــــ
الدلال منك وتيهك شجعونى
العيون ورموشها حالا شنكلونى
والوداعه، كل دول أسباب جنونى
همَّا دول وحياة خيانتك وقعونى
ربنا يقطع سنينك .. مش سنينى!
ـــــــــــ
السياسه تخرب الدنيا العمار
يعنى دى شبهتها بلعب القمار
ما تلاقيشى منها غير بس الدمار
شوف ولاحظ حالة الساسة الكبار
لجل ما تصدق بدون ما احلف يمينى
ـــــــــــ
السياسه تشبه الدنيا اللعينه
أو فى (سيشل) ولا ترسى فى أى مينا
يوم فى مصر وتانى يوم تبقى فى أتينا
يعنى أنت وقسمتك يا سى أخينا
تبقى واقعة حضرتك لون حبر شينى
ـــــــــــ
إوعى تعمل يوم يا سى السيد سياسى
إنت فاكر قلت لك إيه ؟ ولا ناسى
يعنى سيبك من حماسك أو حماسى
أو أقول لك حاجه تانيه(ياسى.. ياسى)
رد يا سى الأخ وبرأيك وافينى
ـــــــــــ
حاشا إنى فى يوم (أسايس) ألف حاشا
سيبنا منها ليه تكون زى الفراشه
وانت إوعى تتبلف يوم م البشاشه
قول إيه إزى صحة كل باشا؟؟
كل يوم أسمع يا شيخ أخبار تجينى
ـــــــــــ
آدى أصناف العيا وغيرهم كتير
آه ياريتنى أعيا بالصنف الأخير
كلها أصناف ما تحتاجشى السرير
كنت أفرح وم الفرحه أطير
ربنا قادر .. ويمكن (يبتلينى)!!
ـــــــــــ
يبتلينى بواحده لبلب فى القرايه
والشروط لازم تكون كامله الربايه
والكتابه لجل ما تحرر معايا
عندها إنصاف عشان تعذرنى يايا
لو يكون يوم جيبى أنضف من سى (صينى)
ـــــــــــ
رأيكم فى الفكره إيه مش لطيفه ؟
حره ، صالحه ، عينها مليانه وشريفه
أما باقى الشرط دكهه تكون خفيفه
شاطره فالحه، حلوه، محبوبه وأليفه
واللى تعجبها الشروط تصبح تجينى !!
تعليقات
إرسال تعليق
أترك تعليق