ومهما خبوا ع الدنيا
تفاصيله
هيفضل اغلى أغنيه
وتتردد مواويله
تقول ان البطل مصري
عربي اصلي من اسيوط
ومن اسوان ومن طنطا
عالي الهمه كتفه عريض
ومن دمياط ومن جرجا
وسيناوي شبع م الغيط
ومن قبلي ومن بحري
وطول عمره ذكي وحويط
وتعليمه ما يفرقشي
عرف يقرأ سمع او شاف
جيناته كات بتوصف له
كرامه ف الحياه وانصاف
عَدّل كُل التاريخ ببارود
وخلا الارض فوق الجود
وحاطط روحه فوق كفه
وعند الجد طق بارود
أصيل واسمر ودمه خفيف
شرب من أرض وادي النيل
وداس ع الطمي ف بلاده
عشق ونجومه ماليه الليل
وعاش جوه البيوت رايه
وشاف الفرح ف القناديل
ولم الدود ف غيط القطن
لبس كستور وشال التيل
ومتعلم مع المجاميع
ومتفرج على التفاصيل
وشاف الذل ولا حبوش
وحالف يمشي بالتساهيل
وقف يحرس حدود بلده
وكان شنجي مع برنجي
نبطشيه وشالها اتنين
ولما شاف كلاب انجاس
بتتسرسب حدا حدوده
زعق من نوبته واتحدى
يفوت القهر من عنده
وخاف ع الحد من عيبهم
وقف كالهول يصد الغول
وطلقه تسبق الزعقه
وجاب الحد فوق الحد
رسايل للي باعو العرض
ولا تهمُهً تفاصيلهم
ولا ننسى تفاصيله
يكون مسعد
يكون مخلص
يكون هادي يكون فادي
اهو مصري وم الوادي
لكن ف وقت جد الجد
منع انجاس يعدو الحد
جينات ف الدم ياأهل الله
تنام لكن تقول الله
وتصمت يوم او ميه
ولا تصحى إلا بتزغرد
تحرر كل رملايه
وترسم ع الحدود غيه
خلايا وارثها من جده
وجد الجد من قبله
ومن يوم رايح انتو مين!
واحنا كتير مايتهدوا