.jpeg)
كل صباح نصحى على هم جديد، كلام مستفز زى السم. سيبنى ياريس اتفك وادردش معاك بصدق يمكن كلامى يفيدك، او يخفف عنى. انا لابازاحمك على منصب، وان كان هذا حقى دستوريا، ولا طمعان فى ذهب المعز فأغنانى الله بمنصب رفيع أستاذ جامعى.
أول من أمس فى مؤتمر الشباب بالإسكندرية قلت مخاطبا الشعب المطحون: أنا مبخافش أبدا، ولو خفت كنتم كلكم زمانكم في خراب ودمار". الحقيقة ده كلام خايب مالهوش أى لازمة،
ياريس طفح الكيل، لسنا عبيدا، ولا انت اسبارتكوس محررهم. كفاية كده، زى ماانت من حقك تتكلم وماحدش يحاسبك احنا من حقنا نتكلم زيك ونص، واحبسونا على كلامنا، كرهتوا الواحد فى عيشته، بس خلاص مافيش سكوت. مش كده وبس ده كمان قلت "لو مطولناش بالنا على بعض وتفهمنا الواقع، هتطالبني بمطالب مش هقدر ألبيها لك، وهتتهمني بالتقاعس". نطول إيه اكتر من كده، طولنا حبال صبرنا إلى أن تقطعت وتحللت أجسادنا، الرحمة حلوة ياريس، احنا مابنطلبشى، احنا مواطنين لينا حقوق، احنا اصحاب البلد دى مش عبيد فى عزبة نطلب حسنة من صاحبها.
وقلت أيضا: "دلوقتي أنتم شايفين إن في مشكلة دولار في مصر، أنتم هتحلوها إزاي، مش أنا هحلها إزاي، ومش الحكومة هتحلها إزاي، إحنا كلنا هنحلها إزاي". ياسلام!!!!! لا حضرتك ولا الحكومة لكم علاقة!!! حاجة غريبة. الله.. الله.. بالذمة ده كلام، نحلها احنا الشعب ابن الستين فى السبعين!!!!! أليس فى هذا تجنى؟! بصراحة ياريس انت وحكومتك لازم تحلوها، انتم السبب، نحن لاعلاقة لنا بها، انتم لم تستشيرونا عند الإستدانة لا احنا وافقنالكم، ولاشفناكم وانتم بتصرفوها.
حلوها الله يحلها علينا، ويكفى صبرنا على الفقر وارتفاع الأسعار وسوء الحال، والكلام اللى يسم البدن كل طلعة شمس، وسجن شبابنا واعراضنا شرفنا واعز مانملك. طبعا ياريس القائمة طويلة انت ادرى بها مننا، وان كنت ناسى افكرك؛ كلامك فيه نهر وزجر واتهام بالجهل لأصحاب الرأى، قلت "خلص الكلام" لتخرس المعترضين على التفريط فى تيران وصنافير.. وسكتوا، واخرست استاذا جامعيا عضو البرلمان على الهواء امام العالم، واتهمته بالحهل وتساءلت ساخرا مستنكرا " هو انت درست الموضوع ده" والرجل اتبل فى هدومه من المفاجئة".
حملت ثورة 25 يناير 2011 كل المصائب، وللحق لوكنت منك لعظمتها أيما تعظيم، فلولاها ماصرت رئيسا، هى من منحتك الفرصة. والموضوع بسيط من غير زعل، إلغ ثورة يناير، ورجع الوضع لأصله للرئيس مبارك وولاده من بعده، وكل واحد يلزم مكانه قبل الثورة، وخلصت الليلة من غير ماتزعل نفسك.
طبعا لو تراجع فيديوهاتك لرأيت معاملة للشعب لاتليق بمقام الرئاسة، ولا بقدر الشعب الصابر العظيم. ياريت ياريس ومصر تستعد لانتخابات رئاسية قادمة ان تفك كيس الحرية لينعم بها الشعب وياخد نصيبه، استعدادا لانتخابات حرة، ونكون شاكرين لو اخليت سبيل كل الحرائر السجينات، ولو كرمك يزيد وتخرجهم كلهم سجناء الرأى بمناسبة الانتخابات يكون عمل عظيم. ماينفعشى يكون فيه انتخابات حرة وحرائر مصر فى السجون.
ماتزعلشى منى ياريس احنا فى سن بعض بس انت محظوظ بقيت رئيس وانا منحوس استاذ جامعة لاحول له ولا للجامعة من قوة. التعليم نزل خالص. وياريت تبلغ الامن يخفف قبضته على الاساتذة. تصدق بالله جالى استاذين من اكاديمية علمية محترمة زيارة لنا فى القسم، جاءوا لانهم شركاء فى مشروع علمى. عارف اللى حصل، والله ياريس وماليك على حلفان، وقفوهم بعربباتهم اكتر من ساعة بالرغم من انه كان عندهم خبر قبلها بيوم... لكن لازم رجال الامن يفردوا علينا. عندما تهون كرامة المعلم بشكل عام، فاعلم أن الدولة قد هانت ولا احترام لمؤسساتها. تعبنا ياريس لو انت تعبت سيبها لغيرك، اوعى تفتكر انك انت اللى حاميها، محمد على كان ببتهياله كده وفاروق وناصر والسادات ومبارك ومرسى كلهم.. راحوا فين.. مشيوا وقعد الوطن، وانت فترة طالت ام قصرت وهتمشى فبلاش مبالغة. وكل اللى حواليك هم اول من سبهاجمونك.
واخيرا ياريت قبل ماتمشى تلغى المنشور ده"في ضوء توجيهات السيد رئيس الجمهورية قام مجلس الوزراء بإصدار تعليمات لمؤسسات الدولة بأن الحصول على دورة تأهيل داخل الكلية الحربية لمدة ستة أشهر شرط أساس التعيين، وأن يتم إصدار شهادة بذلك وتكون من مسوغات التعيين" هذا قرار معيب يسيىء لك، ولو هتخليه ياريت تلحقه بقرار آخر على كل مواطن ان يرتدى الزى العسكرى، وان تكون درجة العامل من اسفل لأعلى موازية او مكافئة للرتب العسكرية، وان يرأس كل مؤسسات الدولة بلا استثناء جنرالات. استأذن ياريس، اروح بيتى ولا بيت السلطة. مازالت الكرة فى ملعبك لاتصغ لأصحاب المصالح،
هذا وطن يستحق افضل مما هو فيه. أللااا صحيح هو امتى هتعوموا الجنيه علشان الكل يغرق؛ وطن وسلطة وشعب.. لا قدر الله. احذروا لن تنجوا منها.الناس مش لاقيه تاكل، بتسف التراب. صبرهم ليس موافقة، وصمتهم ليس رضا، إنه الصمت الذى يسبق الإعصار.
15 يونيه 2023