أسف يا أبني كنت فاهم غلط
كل النهايات السعيدة خيال
الشر هو الخالد الأبدي
والخير ضلال
دمك حلال زي الميلاد والموت وبعض الحقايق
والخير مابيطولش وادي انت شايف
عمره ع الشاشة دقايق
وانا كنت فايق لما علمتك تقاوم
في حد يابن الناس يصدق فايق ؟
الضلمة أبقي من نهار فضاح
أياك تصدق أغاني تحفزك لكفاح
الحر عبد لمبادئه
يبقي أسمه عبد
العبد هو الحر
كل العبيد هللوا لانتصار الشر
والمر مهما تغرقوا ف سكر
حيفضل مر
حتي الوطن معناه بيتغير
وبقاله معدة عفية تهضم زلط
أسف يا أبني كنت فاهم غلط
نسيت اقولك يابني ماتضعفش
قصدي ماتحبش
وان حد قالك بحبك برضه ماتصدقش
مفيش في البلد دي حاجة تتصدق
ولا فيها غير الكره متقدر
وعيش أناني قد ماتقدر
كل التاريخ فاسد ومتزور
حتي حكايات الحب كدابة
لا ليلي حبت قيس
ولا عبلة حبت عنتر
سيبك من الأحلام وأوهامها
والشعر والروايات وأي كلام
يخلي عقلك يوعي ويفكر
وخلي جلدك تخين راح تعيش أكتر
كل اللي راهن ع المذلة نجح
أما اللي راهن ع الكرامة سقط
أسف يا أبني كنت فاهم غلط