دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
****
" بكرة اللى جاى "
لما سال دمى ف شوارعك
تنكريه ؟
لما طال صوتى ف ميدانك
تكتميه ؟
لما قرب حلمنا يبقى حقيقة
تخنقيه ؟
لما يصرخ قلبى بهتاف
تسجنيه ؟
هو انتى ايه
ما بتفهميش
كل ما النور يدخلك
من باب و شيش
ما تفتحيش
هوه انتى ايه
ما بترحميش
على كل حال
انا مش هبطل حلم
مهما يطول غيابك
مهما تقفلى ف وشوشنا بابك
مهما تحبسى ف الليل شبابك
تفهمى
متفهميش
انا اللى بكره جى
جايب معاه الضى
تصدقى
متصدقيش
ميهمنيش
مسحراتى الوطن
و الحلم و الموال
يا أه
يا عين
يا ليل
ومن عصابة لعصابة
و من وحوش لديابة
مخطوف يا حلم السنين
ومهما زاد الألم
و مهما نزف القلم
لكل فجر أنين
و لكل حلم أوان
من الميدان للميدان
أرحام و شايلة جنين
جاى النهار فى معاد
بنات فى ايد اولاد
شايلين علم بروحين
و.مهما زاد العناد
لكل فجر معاد
مسحراتى بطول البلاد
أصرخ ليلاتى
إصحوا و فوقوا لكل آتى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق
الله علي جمال الصورة الشعرية وبساطة الحرف الراقي 🌹
ردحذف