الدعم الجماهيري للوجه الصاعد حصلت مع احمد مكي في سيت كوم تامر وشوقية، ومحمد فراج في فيلم 1000 مبروك، ومع طلعت زكريا -الله يرحمه- لما نور قوي في فيلم سيد العاطفي.
تلاقي نفسك فجأة بتتشد للموهبة اللي فرضت نفسها، بتحس بتعبه وشقاه وايام الفقر والصعلكة من ورا الاجتهاد والتركيز، بتفرح بنجاحه وبتقول هييييه.. ولادة يا مصر.. لاقينا موهوب جديد.
بتفضل واقف وراه مبسوط بنقلاته بعدها أو تزعل عليه لو ضل السكة.. عشان انت الجمهور.. أنت الوصي الحنين على المجتهد.. وفي ذات الوقت انت القاسي الظالم اللي مبترحمش اللي تنجمه وترفع سهمه وهو يخذلك.
جزء منك شرير متنكرش، بتطلع لسانك لكل نص موهوب اتفرض على الشاشة، وبتقوله: فوق يا مدعي الابداع.. الموهوب الحقيقي أنس وشرف مطرحه، اركن انت بعلاقاتك ولجانك وترنداتك، واللي هنقعده في قلوبنا النهاردة جاي بقبول رباني مش بتصويت مشكوك فيه.
النهاردة اتولدت رحمة أحمد، مربوحة هانم في الكبير6، أنا معرفهاش بس في كل حركة منها وافيه اترمى شفت بنت طلع عينها في المسرح واتشقلبت لحد ما وصلت لبطولة مسلسل مهم وكبير وكانت قدها وقدود، وعظمة مكي أنه كان بيفرشلها ويديها المساحة، يفكرك بالمهندس واللي عمله مع سناء يونس في سك على بناتك.. دعم موهوب وصل لموهب هيوصل.