كل زنازينك عبادة .. كل ميادينك آدان
دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
*****
" كل زنازينك عبادة "
إخطفينا من شوارعك
احبسينا فى نار سجونك
بكرة نور الثورة يطلع
تانى و ينور عيونك
اللى شاريينك جدور
ميخافوش من اى سور
و اللى بايعينك ديابة
ارضهم ناشفة و بور
كل زنازينك عبادة
كل ميادينك ادان
مهما زادت البلادة
ضى حلمنا له اوان
إإقسى أكتر زيدى ظلمك
و إقفلى كل البيبان
إقتلى جوانا حلمك
نشفى فى أرضك عيدان
مهما زاد ف الليل سوادك
مهما حاصرونا الوحوش
النهار شايل ميلادك
كل حلم و له جيوش
القمر يبدأ هلال
ثم يكمل فى الليالى
و سوادك مهما طال
النهار طالع يلالى
مسحراتى الوطن
و الحلم و الموال
يا اه
يا عين
يا ليل
علمنى موج البحر
ان الزبد زايل
علمنى صبر النخيل
ان الوتد شايل
مهما تكون الرياح
الجدر مش مايل
ضل الشجر ممدود
لقلوب ما تتمايل
دواها حلم وطريق
ما يعرف المايل
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق