أجرى الممثل الكوديدي السابق ورئيس أوكرانيا الحالي زيلينسكي مباحثات مع قادة أوروبا وأمريكا، وموتهم من الضحك، طلب من رئيس الوزراء البريطاني جونسون فرض حظر طيران على روسيا، نظر إليه جونسون باستغراب، وقال له إحنا فعلا عاملين حظر طيران، هلل زيلينسكي واتنطط من الفرح، لكن جونسون قال له وهو بيضحك: عاملين حظر على طيراننا إحنا ومنعناه يقرب من روسيا أو أوكرانيا، عشان روسيا عندها دفاع جوي وطيران جامد جدا.
اتصل زيلنسكي بالمستشار الألماني وشكره على عدم تشغيل خط غاز السيل الشمالي2، وقال له ياريت تقفلوا كمان خط غاز السيل الشمالي1، فقال له أنت عارف بتقول إيه؟ لو عملنا كده يعني نص مصانعنا تتوقف، وسكان ألمانيا يتجمدوا من البرد.
قال زيلينسكي أكلم ماكرون، وطلب منه إعلان إنضمام أوكرانيا إلى الإتحاد الأوروبي، رد ماكرون وقال له عليكم تقديم طلب، لعرضه على مفوضية الإتحاد، قال زيلينسكي: ليه التعقيد ده؟ أنت مش رئيس الإتحاد حاليا، توقيع منك وكل شيء يمشي وروسيا تخاف وتخرج. قفل ماكرون في وشه الخط .. وزيلينسكي يقول: آلووو مسيو ماكرون .. آلوووو
قال مفيش فايده إلا مع بايدن رئيسهم كلهم، وطلب من بايدن ضم أوكرانيا لحلف الناتو بسرعة، وطرد روسيا من منظومة السويفت، رد بايدن وقال له موضوع الناتو صعب حاليا، وبياخد وقت، قال زيلينسكي طيب إطرد روسيا من السويفت، رد بايدن وقال له عرضت الكلام ده على حلفائنا في أوروبا، قالوا مش هنلتزم، لأننا محتاجين غاز روسيا، عرضته على المختصين هنا قالوا إوعى، دا آخر سلاح معانا، ولو تم خرقه أو تجاوزه ينهار الدولار، ونبقى على الحديدة.
زيلينسكي قال يبقى مفيش مفر إلا إني أكلم بوتين ,اطيب خاطره، رد عليه مكتبه وقال له: بوتين بيقول ما يعرفكش، قال لهم فكروه بأني رئيس أوكرانيا، وقولوا له زيلينسكي بيسلم عليك وبيقول لك أنه موافق على رفض الإنضمام للناتو، وأوكرانيا تبقى محايدة، وألغي قرار منع استخدام اللغة الروسية، وأوقع على تنفيذ إتفاق منيسك، وكل اللي أنت عاوزه، سابوه شويه ع الخط، وقالوا له بوتين قال مش فاكرك خالص.
الوقائع حقيقية مع بعض التصرف في الصياغة
تعليقات
إرسال تعليق
أترك تعليق