ناقص إيه؟.
قوم يا عطية اسأل درويش...
ناقص إيه عندنا ما غليش؟...
العدس معدي التلاتين...
واللحمة بمية وعشرين...
قلبوها سراية مجانين...
وإحنا إلي بقينا المهاريش...
ناقص إيه عنندنا ما غليش؟...
عيشة الكل بقت بطالة...
ما بقاش فيه في بيوتنا زبالة...
بناكلها في صمت يا رجالة...
ما إحنا جزم عايزة الورنيش!!!...
ناقص إيه عندنا ما غليش؟...
إيه على حب بلدنا يشجع؟...
حاجة تخلي الحُر يرَجَّع...
إن قام المسكين يتوجع...
ما ينوبهوش إلا التلطيش...
ناقص إيه عندنا ما غليش؟...
إيه ذنب الغلبان دا يا مصر؟...
لما عصابتك تعصره عصر؟.....
مش طالب عربية وقصر...
مش طالب غير إنه يعيش!!!...
ناقص إيه عندنا ما غليش؟...
كله خلاص غرقان في سكاته...
وإن شاف مصري بينهي حياته...
أو بيبيع للغُرب مراته...
أو بيبيع برشام وحشيش...
ناقص إيه عندنا ما غليش؟...
بص وشوف بعنيك يا حبيبنا...
شوف بعيونك أكل صاحبنا...
لم ولاده ودابح جبنة...
مش فلمنك. دي جبنة قريش...
وإلي بترعش صبح وليل...
مشيها مشي يهد الحيل...
ماشية يا عيني تبيع مناديل...
للحَبِّيبة على الكرنيش...
ناقص إيه عندنا ما غليش؟...
وموظف ينهج من همه...
بيقول للأولاد اتلموا...
شغله مطلع ميتين أمه...
والقبض شوية ملاطيش!!!...
ناقص إيه عندنا ما غليش؟...
لو هايجيب للأولاد عشوة...
لازم طبعا ياخد رشوة...
ليلة يادوب هايعيشها في نشوة...
بعد النشوة امسك يا شاويش...
ناقص إيه عندنا ما غليش؟...
والشيخ إلي بيهبر هبر...
بيعلمنا فضيلة الصبر...
ما إحنا من المولد للقبر...
صابرين ومفيش إلا مفيش
طول اليوم الشيخ بيقَرَّع...
ويعلمنا إزاي نتورع...
ويقول لك يا فقير اتبرع...
للقاضي وأسيادنا الجيش...
ناقص إيه عندنا ما غليش؟...
قاعد يطفح كفتة وطرب...
وبيدعي بزوال الكرب...
وإن قَرَّبت هاتاكل ضرب...
ضرب هايطلع م النغاشيش!!!...
أنا نفسي أعرف أي حياة؟...
لما نشوف مصري يا ولداه...
نفسه في لحمة بس غداه...
شفطة شاي جنب القراقيش...
وإلي يقول لك دا الدوا غالي...
عايز دوا ليَّ ولعيالي...
اعمل إيه دبرني يا خالي؟...
اعمل إيه دايما معاييش...
هاتموت لو ما لقتش علاجك؟...
طيب. ما تموت. مين محتاجك؟...
إيه الصح؟ تموت بمزاجك؟...
ولا بإيدنا تروح ما تجيش؟...
نفسي اللص زعيم البوم...
يطفح أكل المساكين يوم...
بالتأكيد هايموت مسموم...
لو جرب أكل الحرافيش...
قبل الكرسي وعد بحاجات...
واتمرقع زي الستات...
صدقنا ورحنا نقول هات...
قال لك يا خسارة ما عنديش...
إزاي للعسكر حنيتِ...
ورقصتِ بفرحة وغنيتِ...
صدقتيهم واستنيتِ؟...
لا يا بلدنا ما تستنيش...
ادفع. ادفع. ادفع ادفع...
للي يضر وعمره ما ينفع...
لسياسي لا ينفع ولا يشفع...
أو للإعلامي الهبيش...
قِدِم الفلم بجد وباخ...
وإلي بيجري انهد وداخ...
علشان أسيادنا الأوساخ...
باعو قمرنا للخفافيش...
نقص في أكل وشرب ودار...
والنقص أكتر في الأحرار...
آه يا وطن لو لك ثوار...
آه يا جناح لو كان لك ريش!!!