نشرت أسرة أحمد دومة تفاصيل الأعتداء الذي تم على أحمد في السجن والتي روى تفاصيلها أثناء الزيارة التي تمت في ذكري قيام ثورة يناير وقالت أسرة دومة على صفحات الفيس بوك :
زرنا احمد من يومين زيارة استثنائية بتصريح من النيابة، شكى بعض الاجراءات اللي شايفها تعسفية بحقه منذ انتقاله حديثا لسجن المزرعة.. زي منع الصحف القومية والتليفزيون الرسمي وتقليل ساعات التريض لساعه ونص بس فاصبح بيقضي ٢٢ ساعه ونص في زنزانة ضيقة جدا مع مسجون تاني ( قبل كده كان بيخرج ساعتين تريض وساعتين او اكتر في طرقة بين الزنازين) .. طلب منا احمد اتخاذ كل الاجراءات الممكنة لتحسين الوضع ده واسترداد ما تم التوصل اليه قبل كده من حقوق اساسية بعد مطالبات و مواقف ومعارك خاضها احمد واسرته وفريق المحامين طول ال ٨ سنين اللي فاتوا.
فوجئنا امبارح برسالة من احمد بيطلب فيها تقديم بلاغ للنائب العام ضد احد ضباط سجن عنبر الزراعة لتعديه عليه فزرناه تاني النهارده الزيارة الاستثنائية بمناسبة ذكرى ٢٥ يناير، احمد وضح انه اثناء نقله لعيادة الاسنان بسجن عنبر الزراعه قام ضابط الترحيلة بإيقافه في مكان معين حتى ينهي اجراءات دخوله، بعد شوية ضابط تاني من مسئولي السجن قاله بطريقة مهينة: انت ايه اللي موقفك هنا امشي اقف هناك، احمد كان رده: اتكلم مع الضابط المسئول عني متكلمنيش. ضابط السجن سأل ضابط الترحيلة مين ده؟ قاله يا باشا "مسجون" وقفه مطرح ما تحب!
فبدأ الاخير بسحب احمد بالقوة مع فيض من الزعيق والهمجية وكأنه بيعاقبه بس عشان قاله اسال الضابط متكلمنيش، اثار سحبه بعنف تركت علامات على ايد احمد لسه واضحة لحد النهارده، الامر تطور ان احمد كمان زقه وبدأ يزعق ومع علو الصوت تدخل رئيس المباحث والمأمور اللي بالصدفة كان يعرف احمد من حبسات سابقة وانهوا الواقعة قبل ما تتحول لتشابك عنيف
الواقعة انتهت بعد قدر من الاهانات ولم تتحول لكارثة لأن المأمور عرف احمد وانهاها، مين يضمن لو متمش انهائها بالشكل ده كانت هتنتهي بأيه؟ مين يضمن حماية مماثلة لمساجين اقل حظاً؟ مين يضمن عدم تكرار مثل هذه الاهانات وحماية احمد وكل المساجين من غرور ورعونة النوعية دي من الضباط؟
ليه غريب او مستفذ ان مسجون يتعامل بندية ويقرر انه بني ادم له حقوق ويرفض التجاوز في حقه او معاملته كالقطيع؟ امتى هيكون في ضوابط و رقابة على اداءات الضباط دي ويعرفوا انهم مسئولي حماية وتنظيم مش اسياد على عبيد؟
نطالب نحن اسرة احمد دومة النيابة العامة وادارة التفتيش بوزارة الداخلية بالتحقيق في الواقعة وسؤال الضابط المعتدي و ضابط الترحيل ورئيس ومامور سجن عنبر الزراعة وتفريغ كاميرات المراقبة واتخاذ كل الاجراءات اللازمة لضمان امان وسلامة أحمد داخل محبسه، كما نطالب وزارة الداخلية بتمكين احمد من حقوقه الاساسية طبقا للقانون ولائحة السجون.
وقد تواصلنا مع السفيرة مشيرة خطاب والاستاذ محمد انور السادات وطالبنا بضرورة التحقيق في الواقعة وسؤال المسئولين عنها، كما قام فريق الدفاع عن أحمد بتقديم بلاغ للنيابة العامة اليوم يحمل رقم ١٣٩٥٠ عرائض/ المكتب الفني، نأمل أن تتخذ الاجراءات حياله بشكل عاجل .. سنعاود زيارة احمد الاسبوع المقبل حيث يستحق الزيارة الدورية، لنطمئن ونقف على التطورات