حدوتة قبل النوم: الشاطر حسن وخاتم سليمان..
الشاطر حسن له عم شرير شرير اسمه قاسم ..احتال لغاية ماسرق خاتم سليمان من الشاطر حسن..
قاسم امر الخاتم أنه يبني له قصر في الضفه التانية من النهر ..ساب الشاطر حسن وحيد، بعدما آخد كل امواله وقصره وخدامينه..رماه ع الطريق.. ما فضلش مع الشاطر حسن من اصدقائه القدامي .. الا: الكلب والقطه والفار ..
الشاطر حسن .. حزين ..يبكي ع اللي راح ..اصحابه التلاته الطيبين دول .. زعلوا لماشافوه كده ..قالوا لبعض لازم نساعد حبيبنا حسن ..نجيب له الخاتم ..ياللا ياكلب !!
ركبوا القط والفار فوق ضهر الكلب ..عدوا النهر ..بشويش..بشويش..دخلوا قصر الشرير قاسم..الفار كمش في الجحر ..قعد يتصنت ..يبص..يفتش ع الخاتم هو والقطة ..لغاية ماعرف ان قاسم لما بينام بيحط الخاتم تحت لسانه ويقفل بقه عليه ..
تعمل ايه ياعم الفار..تعمل ايه يابو الفرارين ؟؟!!..اخونا الفار مخه حلو..شغال ..مش زي مخ بعض حبايبنا البهايم ..
الفار حط ديله ف صفيحة الجاز..غرق ديله جاز..لما نام عمنا قاسم ..الفار دخل ديله متعاص جاز في مناخير قاسم..قاسم عطس..الخاتم نط من بقه ..وقع ع الارض..القطة نظرها قوي..زي ماعارفين ..خطفت الخاتم..حطته في بقها وطلعت تجري.. يلا ياعمي الكلب..يلا ياحبيبي يافار..يالا نعدي النهر ..نودي الخاتم لحبيبنا الشاطر حسن..
الكلب ابن الكلب ..مسمر رجليه في الأرض ..قالهم: مش ممكن ..لازم انا اشيل الخاتم في بقي..انا اللي اوديه للشاطر حسن..القط والفار يقولوا له: عيب.. ياكلب ماينفعش ياكلب..ياكلب خشمك سايب ..يوقع الخاتم..ياكلب اختشي.. خشمك سايب ياكلب..انت ياعم الكلب بتهو هو ع الفاضي والمليان ..الكلب رفض اي تفاهم ..لازم يحط الخاتم ف بقه ..المهم..القط والفار يعملوا ايه مفيش قدامهم حل تاني يعملوه ..ادوا الخاتم لعمنا الكلب..حطه في خشمه ..ركبوا علي ضهر الكلب ..عام اخونا الكلب ..فاشخ بقه..مترين..شويتين..قول ثواني.. الخاتم نط من بقه وقع في البحر ..بلعته سمكة قرش مفترية.. ضاع الخاتم..ضاع تعب عمنا الفار وخالتكم القطة بسبب غباوة ابن عمنا الكلب!!
توته توته مخلصتش الحدوته.. يمكن بعدين أكملها لكم..يمكن.. لو كان في العمر بقية !!