د. يحيى القزاز يكتب : طفح الكيل .. دردشة للرئيس

فى ناس مستغربة وبتقول هما العاملين في التليفزيون المصرى عاملين إحتجاجات ليه!!؟ دول بيقبضوا قد كدا ومبيعملوش حاجة..

احب ارد وياريت كل إللى عنده ضمير يشير ردي دا

اولا إحنا مرتباتنا الحد الأدنى بالحوافز والبدالات وكل حاجة ٣٠٠٠جنيه مزدوش جنيه من ٢٠١٥تقريبا ودا قبض تقريبا لحد الدرجة الثالثة يعني موظف او عامل مدة خدمته تفوق العشرين سنة.. أما الحد الأقصى إللى هو مدير عام بياخد ٦٠٠٠جنيه وساعات ينقصه من الضرايب والخصومات الفرعية إللي منعرفش سببها..

في ناس بتاخد حوالي ١٠٠٠٠جنيه ودول قلة اللي هما مذيعين التليفزيون والمخرجين الكبار مثلا بيكون مضاف ليهم بدل مظهر وشوية حاجات كدا وعايزة اقولكم إن أساسي مذيع محترم درجة اولي ١٥٠٠جنيه..يعني لو تعب ولا خد مرضي بيقبض ال١٥٠٠جنيه

أما الأرقام إللي بتسمعوها دي بياخدها رؤساء القطاعات ورئيس الإتحاد وحاشيته..

وبالتالي جميع موظفين ماسبيرو مديونين لشوشتهم..

ثانيا هرد علي بيعملوا إيه..

بيشتغلوا شغل الحمار علي العربية الكارو.. حضرتك بس إللي مش واخد بالك لأنك روحت للقنوات الخاصة اللى أغرتك بشاشتها المبهجة.. لكن إحنا مازلنا بنؤدي عملنا كما يطلب مننا وأكثر..في معديين ومخرجين ومذيعين في التليفزيون بيجددوا ديكور الإستديو علي حسابهم علشان يشتغلوا وبرامجهم متقفش لأن مفيش ميزانية للديكور.. في الإذاعة وأظن الإذاعات كلها شغالة كما يجب..عمل ٢٤ساعة فحت وردم.. والإذاعة بتتسمع بشكل فوق الممتاز ودا بجهود من أصغر عامل لأكبر موظف..

تكفيات بايظة بنصلح الكراسي هلي حسابنا بنضف علي حسابنا بنشتري صابون وكلور علي حسابنا حمامات لا تصلح للإستخدام الآدمى..بنتعامل بساعة وإللي يتأخر ساعة بتتخصم..إحنا من الاخر بنغزل برجل حمار ورجل الحمار كمان بقت غالية مش لاقينها لأن الحمير بقت تتصدر للصين أو بتتدبح في محلات الكباب..

ربنا ينتقم من كل شخص بيدخل يعلق تعليق سلبي وبيتمني خراب بيوتنا..