يعني إحنا سايبين الحمار وبنتشطر على داود عبد السيد؟!! ما هو فيه حاجة اسمها ذوق، وحاجة اسمها وعي. والاتنين عنصرين مهمين جدا في متابعة الفن والثقافة والأدب، ومستوياتهم وتفاعلهم مع بعض بيختلفوا من شخص لشخص ومن شريحة اجتماعية لشريحة اجتماعية أخرى... وطبعا كلنا عارفين إن فيه جزء من وظيفة الفن، أو إحدى وظائف الفن والثقافة إنها تصنع صيغة أو تطرح صيغة للتعايش السلمي مع الجمهور.. يعني جزء من وظيفة المخرج إنه يطور الصيغة دي، ويشتغل عليها مع شغله الأصلي على الدراما والمادة الفنية...
هو فيه نظام سياسي عايز يعمل فن يخلي الناس تفهم وتوعى وتنزل تضربه بالجزمة؟ هو فيه أشولة فلوس عايزين يرموا فلوسهم في حاجة مابتجيبش فلوس؟! الأسئلة دي بتخص مصر وبتخص أمريكا وفرنسا واليابان والدول الإسكندنافية. الفكرة إن الناس شغالين وبيحاولوا يلاقوا مخارج وحلول وصيغ، وخاصة المخرجين الجيدين المهمومين بالمهنة وبالصناعة وبالدور (دورهم ودور الفن)، وأكيد طبعا المهمومين بالجمهور، لأن الجمهور رقم صحيح وقوي وله الأولوية في معادلة الفن والثقافة...
يعني أنا فاهم إن الأستاذ داود عبد السيد حط صوابعه العشرة في الشق، زينا كلنا: حصار ورقابة وتضليل وتزييف وعي وانتهاك معايير فنية وثقافية وقيمية وإنسانية وضغوط من بتوع أشولة الفلوس الجشعين الجهلة... يعني كلنا واقعين في حفرة بنت كلب.. واضح إن الراجل زهقان وزعلان. ودي فترة كلنا بنمر بيها لما الدنيا بتبقى سيئة كده زي ما هو حاصل دلوقت.. ومش هاننسى إن فيه شروط بيتم فرضها او التلويح بيها بشكل غير مباشر، ولو نفذناها الأبواب بتنفتح وبنعمل أحلى فن وثقافة منحطين وواطيين زي اللي بيفرضوا شروطهم دول. ولو رفضنا أو راوغنا، بيقفلوا علينا المية والنور وبيخلونا نيأس...
طبعا، فيه جزء من دور الأستاذ داود عبد السيد، وجزء من وظيفة ودور كل مبدع جاد ومهموم، إنه يحط صيغة للتعامل مع الجمهور في حساباته وهو بيشتغل. ودي حاجة مش بسيطة في ظل فرض الشروط ولوي الدراع والضغوط من جانب الجهل والقمع والاستبداد والجشع...
معلش. يمكن الأستاذ داود متضايق وزعلان. وأكيد لما هايفوق ويهدا كده، هايواصل دوره الإبداعي الرائد، ويمكن يقدم لنا حاجة حلوة كما عهدناه وكما نتوقع منه...
هو إحنا سايبين الحمار وبنتشطر على البردعة؟! يعني سايبين الأسباب الأساسية والمتسببين الرئيسيين، وبنتشطر على داود عبد السيد؟! يا ريت نهدا كده ونعقل بقى، ونبطل دبح في بعض، ونتعب نفسنا ونحدد المسؤول والمتسبب، وندي بعض فرصة للشغل والإبداع، ونبحث عن مخارج وحلول وقنوات عشان نخفف قبضة الجهل والقمع والاستبداد والجشع والدناوة وقلة الأدب اللي محاصريننا بيهم...