الزوج : ها عملتي إيه علي الغدا ؟
متنسيش أختي وجوزها جايين النهارده
الزوجة : عاملة سمك مقلي .
الزوج : مممممم كويس ... أي مساعدة ؟
الزوجة : لا شكراً أنا خلاص بقطع ديل آخر
سمكة أهو والتتبيلة جاهزة .
الزوج : بتقطعي ديل السمك !! طيب ليه ؟
الزوجة : يعني عاوزني أقلي السمكة بديلها ؟
الزوج : وإيه المانع يعني ؟
الزوجة : هههه يا راجل حرام عليك .
الزوج : حرام !! هي وصلت للحرام ؟
لأ لازم أعرف ليه بقي .
الزوجة : والنبي بلاش إفتكاسات روح غير
هدومك متضيعش الوقت الناس علي
وصول
الزوج : لا بجد ليه حرام نقلي السمك بديله ؟
الزوجة : يا راجل عاوز تضحّك أختك عليا ؟
تقول عليا إيه ؟
وأنت عارف لسان اختك .
الزوج : يعني اختي كمان هتتريق لو شافت
السمك مقلي بديله ؟
الزوجة : طبعاً ... وحتمسكها لى وتدور تحكي
لستات العيله كلها وتركبني العيب .
الزوج : ياااااه ... للدرجة دى قلي السمك بديله
حاجة حرام وعيب ؟
الزوجة : مش حرام بمعني حرام يعني بس همه
علمونا كده .
الزوج : مين دول اللي علموكم ؟
الزوجة : أمهاتنا .... أمي علمتني كده ...
إتريق بقي خلي نهارك ميعديش !!
الزوج : لا لأ الطيب أحسن ...
بس هيه مقلتليش عن سبب وجوب
قطع ديل السمكة قبل قليها ؟
الزوجة : ييييييييه بدأنا في الفلسفة وأنا عارفة
مش هخلص فففففففف .
الزوج : هههههه لا بجد أصل الموضوع مُلفت
للنظر ودفاعك بتلقائية عن قطع ديل
السمكة مع إستخدامك لكلمات زي
(حرام , عيب , الناس تاكل وشي)
مخليني عاوز أعرف عِلة التحريم
وسبب العيب .
الزوجة : عِلة التحريم !!
دانا إللي هيجيلي علة منك ومن
فلسفتك عمال علي بطال
الزوج : ههههه قدرك تتجوزي واحد بيشغل
عقله وبيسأل مش ماشي في قطيع
العقل الجمعي !!
الزوجة : بقولك إيه .... أسأل ماما ...
روح كلمها في التليفون واسألها ليه
بنقطع ديل السمكة قبل ما نقليها
وسيبنى أكمل اللي في ايدى بقي
الساعة داخلة علي تلاتة .
الزوج (بصوت منخفض) :
أسأل حماتي !! آه أسألها آه ...
مسألهاش ليه ..
ربي لا أسألك رد القضاء ..
الزوج : آلو ... ازيك يا ماما ؟
الحماة : آلو خير مش بعادة يعنى , كويس إنك
لسه فاكر إن ليك حماة تسأل عليها
ده انت من يوم .......
الزوج (مقاطعاً) : حبيبة قلبي والله دايماً في
سيرتك وكنا عاوزين نسألك ..
الحماة : وعاوز تسأل علي إيه بقي ؟ ما أنت
طول عمرك عامل أبو العُريف, بركة
إنك أتحوجتلي و ......
الزوج (مقاطعاً) : وإحنا نستغني , أنا كنت عاوز
أعرف ليه بتقطعوا ديل السمكة قبل
ما تقلوها ؟
الحماة : وانت إيش فهمك أنت ؟ هتفتي في
دي كمان ؟ آدى اللي كان ناقص .
الزوج : لا لا بفتي ولا حاجة انا بس عاوز أعرف
من باب العِلم بالشئ .
الحماة : ماهو لازم نقطع الديل آه لازم
نقطعة ... منقطعوش إزاي لازم .
الزوج : أيوه ... لازم ليه بقي ؟
الحماة : لازم وخلاص ... همه علمونا كده ...
اتولدنا لاقينا أهلينا بيعملو كدة,
وبعدين ربنا يحاسبنا يابني , الولاد
والزوج دول أمانة في رقبة الزوجة .
الزوج : ربنا هيحاسبكو ؟!! يعني لو مقطعتوش
ديل السمكة قبل ما تتقلي تدخلو النار ؟
طيب في سبب طبي يمكن ؟
أو طعم السمكة هيتغير مثلاً ؟
في حاجة سامة في ديل السمكة لو
إتقلت هتعملنا امراض مثلاً ؟
الحماة : والنبي يابني ماعرف ... بس دا شئ
بقي بديهي كده وبنعمله من غير ما
نسأل , أصل دي مسألة ضمير وأمانة
وربنا ميحبش الست تقصر في حق
جوزها وعيالها , طيب ما تسأل الحاجة
نعمات , أهي هيَّا اللي علمتني كده .
الزوج : الحاجة نعمات مامة حضرتك ؟
الحماة : آه والله دي دايماَ بتسأل عليك
وتدعيلك ،مش عارفة بتحبك علي إيه .
الزوج : ههههه حبيبة قلبي وجدة روح قلبي ....
حاضر هكلمها ... سلام .
الزوج : آلو .. ازيك يا تيتة .
الجدة : ميييين ؟
الزوج : انا أحمد جوز سامية بنت بنتك .
الجدة : سوبر ماركت !! لا يابني النمرة غلط
الزوج (زاعقاً): يا حاجة انا أاااحمد ... أحمد
جوز سامية .
الجدة : ازيك يابني واحشني .
الزوج (مازحاً) : والله وانتي كمان . ولو إنك
عملتي أزمة في العيلة هههههه .
الجدة : أزمة ! أزمة إيه يابني كفا الله الشر .
الزوج : ليه يا حاجة بتقطعو ديل السمكة قبل
ما تقلوها في الزيت ؟ مينفعش نسيبه ؟
الجدة : ينفع يابني مينفعش ليه ؟
ده حتي السمكة يبقي شكلها أحسن
في الطبق وعلي الأقل الواحد يبقي
عارف بياكل إيه وميتغشش ويجيبوا له
البلطي ويقولوله ده دنيس
الزوج : الله ينور عليكي يا تيتة ... أهو كده ...
طيب ليه حماتي وسامية مراتي بيقولو
إنك علمتيهم كده ؟
الجدة (ضاحكة): يابني ده كان زمان ... وكنا
مضطرين مش بمزاجنا !!
الزوج : إزاى يا حاجة فهميني ؟
الجدة : يابني زمان أول ما إخترعوا الطاسات
كان حجمها صغير وكانت السمكة
بتطلع براها فكنا بنقطع الديل علشان
السمكة كلها تدخل الطاسة
ومتتحمّرش من عند راسها وديلها
يبقي ني , إنما دلوقتي بقي عندهم
التيفال والميفال يا خويا والطاسة
تساع حوت ب ديله , ويا ريتهم بيعرفوا
يطبخوا ,دانا أيام جدك الحاج الله
يرحمة كان عليا قلية سمك توقف
الشارع علي رِجل من ريحته و ....
الزوج (مقاطعاً) : يعني مش عيب ولا حرام
نقليها بديلها ؟
الجدة : عيب إيه وحرام إيه ؟
إيه يا واد العبط دة ؟ هي سامية
ما جبتش في جهازها طاسات كبيرة ؟
يادي الكسوف ... معلش يابني
الزوج : كسوف !!
الجدة : طبعاً يابني ... حاجة المطبخ علي
العروسة وربنا ميحبش الظلم ...
الناس تاكل وشنا لو مجبناش طقم
الطاسات كامل و ....
الزوج : ومين فرض الفرض ده.؟
وليه ربنا يحاسبكو علي الطاسة ؟
الجدة : والله يابني اتولدنا لقينا أهالينا بيقولو
كدة ومسألناش, ده فيه جوازات بتبوظ
علشان طقم الطاسات.
الزوج (مُهمهماً) : خلاص يا حاجّة خلاص ...
أنا عرفت دلوقتي إزاى بتتفرض
المفروضات وبعد شوية تتنقل لخانة
المكروهات ثم المحرمات وتكتسب مع
قِدم القول بها قداسة يستحيل نفيها
ونأثم إذا خالفناها !!
مممممم ده لولا إنك ربنا يديكي طولة
العُمر موجودة وحِسك في الدنيا معانا
مكنّاش هنعرف نوصل لأصل موضوع
ديل السمكة ده, ولو كنت قعدت أنا
300 سنة أحاول أقنعهم إن قطع ديل
السمكة قبل القلي كان تَصَرُّف لضرورة
محكومة بظروف وأدوات زمانها ولعِلة
إنتهي سببها وإن معرفة ودراسة الأحوال
ضرورة لفهم الأخبار والأقوال محدش
كان هيسمع ... ومش بعيد جماعة
’’أنصار بيت البُلطي’’ كانت تكفّرني
وتقتلني علي إستهزائي بما ثبُت وتواتر
عن وجوب قطع ديل السمكة قبل قليها .
الجدة : بتقول ايه ؟ مش سامعة يابني ..
علي العموم متزعلش يابني هاجيبلك
أنا الطاسة .
الزوج : لا يا حاجة كتّر خيرك إحنا إللي مجتمع
محتاج يقلع من علي دماغه الطاسة !!
#نقلا عن واحد مشغل الطاسة ..
ويا رب نشغلها احنا كمان قبل ما يفوتنا القطر
ونفهم احنا بنعمل ايه ..!!!
الطاسة فى الخطاب الشعبى المصرى تعنى الدماغ !!