انت لسه ماموتش
لا والله انا عايش
بتحرك
م الصاله لاوضه النوم للبلكونه
وماسك فى ايديا التليفون المحمول
وانا باكل
وانا باشرب قهوه
وبكتب بوستات
ليها لازمه وملهاش لازمه
وبعزى اصحاب فى اصحاب
وبهنى صحاب بجواز الواد وجواز البنت
بحفيده اللى بيضحك فى الصوره
وبتخانق واتصالح
وببرر احيانا
او بسكت خالص
واعمل لايك
وبعاكس صحباتى الاجمل فى الشعر الابيض
واصحابي اللى ماعدش الليل بيساع اغانيهم
ولاحتى الشارع بيشيل خطاويهم للقهوه
ولاعادت ضحكتهم بترن
على نكته قديمه
انت ماموتش
لا والله
انا عايش
مش بالظبط
لكن ماشيه
لسه بسمع اخبار الموت فى النشره
وبقلب فى القنوات
واغضب وافرح
واهدا
وبسمع مزيكا وبحزن
لما اسمع عن حد نايم فى البرد فى زنزانه
واستنى الصبح
واستنى الليل
واستنى اغانى الست وفيروز
وبادور على قطره تشيل النغششه م العين
وامسح فى قزاز النضاره
وببص على ملامحى فى مرايه قديمه
انا لسه ماموتش
انا عايش
تعليقات
إرسال تعليق
أترك تعليق