أنس دنقل يكتب : الناس و التعليم !!

 بمناسبة التعليم ومشاكله تعالوا نتكلم عن التعليم في بلادنا..

عملت فترة طويلة في مجال الادارة المحلية اضافة لكوني اب لصبيان وبنات..لهذا اذكر لكم هذه الواقعة :

كنت رئيس وحدة محلية ..زرت مدرسة ابتدائي.. مديرها صديق ..رجل محترم..ناقشت معه بصراحة مشكلة انهيار مستوي الخريج حاليا مقارنة بالماضي..

قال لي: المشكلة طلاب لاتتقبل التعليم ..ادخل اي فصل يعجبك واختار إي طلاب واسالهم لتعرف ..المهم اخترت دخول فصل في سنة خامسة ابتدائي..اخترت تلميذ شكله حيطة مسلح  .. آخر عكسه تماما .. ضعيف ..نحيف ..انطوائي..كنت متعمد هذا الاختيار ..اثق انهم علميا زيرو لكن لاثبت له ان المشكلة ليست تلميذ اومعلم فاشل انما منظومة تعليم فاشلة من الاساس!!

 سألت الحيطة فلم يجب ..تدخل مدرس الفصل قائلا : التلميذ ده حيطة..الدليل تضربه بوكس في وشه او اي حته في جسمه مش بيحس !! 

بالتأكيد الولد مشروع مصارع اوالعاب قوي لو توافرت له الامكانيات..

التلميذ التاني ..علميا ميحة..بس لما قعدت معاه اكتشفت أنه ضمن فريق الإنشاد الديني في الكنيسة ..صوته حاجة جميلة. .طظ اصوات عبد الحليم وفيروز مجتمعين!!

 الحادثة دي خلتني متأكد..ان كل طفل مصري ..مشروع موهبة عظيمة لو احسن رعايتها. .حتي النشال في المواصلات موهبة ..البنت اللي بتشحت ..اللي بتبيع ورد في إشارات المرور ..الواد بلية صبي الميكانيكي..كلهم مواهب ضلت الطريق ولم يحسن استغلالها !!

الدولة --لو كانت لدينا دولة-- يجب أن تهتم بالتعليم النوعي..يعني مثلا اول أربع سنين دول تعليم أساسيات المعرفة..لغة.. يتبعها اكتشاف المواهب.. إعداد الطالب بمايتناسب مع مواهبه..

اهم حاجة الا نخترع نظام لكن نشوف الدول المتقدمة عملت ايه..نفكر كبشر قلبنا ع البلد.. البشر ثروة..بصوا حواليكم ..صناعة ..زراعة.. مفيش ..قناة السويس مديونة..مفيش غير القرشين اللي بيبعتوهم ولادنا في الخارج..ثروتنا البشرية اللي بيبلوا الريق..فيجب ان نهتم بالتعليم ثروتنا الوحيدة اللي حيلتنا إضافة لاكتشاف المواهب المكبوتة المبددة في شعبنا ..

( الدليل: اجمل مغني عربي عبدالحليم حافظ.. اجمل الشعراء.. احمد فؤاد نجم..كلاهما خريجي ملجأ ايتام بالزقازيق )

لاصلاح التعليم :

هل استمعنا لاراء القابضين علي الجمر..معلمينا وخبراء التعليم الافاضل..

هل توجد لدينا الارادة السياسية لاصلاح التعليم..لااعرف !!