د. يحيى القزاز يكتب : طفح الكيل .. دردشة للرئيس

ماحدش سأل نفسه ليه عمرو أديب فتح موضوع أبو تريكه إمبارح وهو عارف انها معركة خسرانة؟ طب ليه كل شوية نتفاجيء بترند عن موضوع ديني آخرهم واقعة إبراهيم عيسى؟ و أكيد الأغلبية مش بتسأل نفس السؤال في التصريحات الكروية اللي بتعمل كل يوم خناقات ملهاش نهاية..

الإجابة السهلة الجاهزة عن كل ده هو إن دي سياسة "إلهاء" من الحكومة عشان مانركزش في مشاكلنا المهمة، لكن بعد إذنكم أنا رأيي إن مش ده السبب الأهم..

السبب الأهم و الأكبر هو الإبقاء على حالة "الاستقطاب الحاد" بكل الصور الممكنة.. 

أي نظام مستبد مش بيعيش غير على تغذية حالة الاستقطاب الشديد، و التأكد من عدم خفوتها..

و في ٣ مواضيع هي الكفيلة بالإبقاء على حالة الاستقطاب المجتمعي دي و توسيعها كمان؛ الطنطنة الوطنية، الدين، و كرة القدم..

ما هو أكيد مش هيسيبنا نتكلم عن الصحة و التعليم، دول يتمنع فيهم التصوير فورا و مايظهروش من الأساس في منافذهم الإعلامية..

اللي عمله عمرو أديب إمبارح يندرج تحت بند الطنطنة الوطنية، هو مش بيخاطب الجماهير العريضة اللي بتحب أبو تريكة ولا هو عايز يكسبها، لأ، هو بيخاطب الفئة الضيقة -لكن المؤثرة- من مريدي النظام اللي فعلا شايفين تريكة إرهابي، و لما بيعمل كده بيوسع الفجوة بينهم و بين باقي الجماهير عشان يفضلوا حاسين بالأمان فقط في حضن النظام و مش بعيد عنه.. لكنه برده لمس مع موضوع الكورة كونه زملكاوي فده هيساهم في توسيع الفجوة - اللي هي مش ناقصه الحقيقة- بين جماهير الناديين.. 

بصراحة هي ضربة معلم، وضرب كذا عصفور بحجر واحد..

أما ترند ابراهيم عيسى فكان على وتر الدين، اللي برده بيخاطب بيه في الأساس الفئة اللي عايزه تسحق الإسلاميين بأي شكل، و هي برده مش بتشوف حماية ليها غير مع النظام، لكن إعلام نفس النظام هو اللي بيبرز تصريحات عيسى بشكل يؤدي لحالة من العصبية و الجدل اللي برده بتساعد ان الفجوة تزيد بين الجماهير و بين الفئة الممسكة بذيل النظام.. برده ضربة معلم تانية..

و مش محتاج بقى أشرحلكم اللي بيعملوه بشكل يومي في مجال الكورة من تصريحات لمسئولين أو حكام أو مذيعين أو غيره عشان يضمنوا إن الفجوة بين الجماهير تفضل تتسع كل يوم أكتر من التاني، و للأسف كتير من أصدقائي اللي بيقروا الكلام ده دلوقتي مش مقصرين معاهم في الدور ده -بدون قصد طبعا..

من الآخر إحنا حرفيا بيتلعب بينا الكورة و بيجيبوا فينا كل يوم بدل الجون عشرة، و بيعرفوا يستغلوا السوشيال ميديا كويس قوي زي ما احنا بنستغلها..

لو احنا كسبنا في معركة أزمة فيلم ريش فهما كسبوا قصادها عشرات المعارك..

نعمل ايه إحنا بقى قصاد الكلام ده لو فهمناه و استوعبناه، دي قصة تانية..